Ministria e Brendshme italiane ka botuar një raport mbi situatën e krimit, ku flitet edhe për organizatat kriminale shqiptare. Raporti i është përcjellë Parlamentit vendas dhe i referohet periudhës periudhën janar-qershor 2017.

Sipas raportit, në pjesën për kriminalitetin me bazë grupet shqiptare thuhet se ato janë të mirëorganizuar dhe baza e tyre janë lidhjet farefisnore, çka e bën akoma më të vështirë përçarjen dhe evidentimin e tyre. Raporti thotë se disa grupe shqiptare në Itali ende mbështeten në rregulla dhe ligjshmëri kanunore, një kod zakonor që daton në shekullin e 15-të dhe në këtë linjë përmend edhe rastet e gjakmarrjes.

“Ky barbarizëm mund të jetë çelësi për të lexuar vrasjen e dyfishtë në nëntor 2016 në Canegrate (MI), dhe u zgjodh nga karabinierët në maj 2017 me arrestimin e porositësve”. Në atë periudhë, u vranë dy vëllezër shqiptarë nga Mirdita, Agron dhe Alban Lleshaj, 27 dhe 24 vjeç. Shkak për krimin e rëndë u bënë grupet rivale kriminale aktive në zonë.

Raporti pohon se grupet kriminale në Serbi, Bosnje, Mal të Zi, Kosovë dhe Shqipëri kalojnë përmes detit Adriatik për aktivitetin e tyre kriminal.

Në raport shkruhet se: “Në territorin kombëtar (Italian) është e konsoliduar prezenca e grupeve kriminale shqiptare, fleksibiliteti i të cilave në veprim ka lejuar në njërën anë diversifikimin e aktiviteteve të paligjshme dhe në anën tjetër ka zgjeruar praninë e tyre në rajone të ndryshme italiane, duke filluar nga Puglia.

Territori i Pulias, në fakt, ishte zona e celulave të para kriminale shqiptare dhe përfaqëson ende sot një vend të detyrueshëm të zbarkimit të aktiviteteve të paligjshme që vijnë nga Shqipëria dhe nga zonat ballkanike. Me kalimin e kohës, megjithatë, kjo formë e krimit ka arritur të zgjerohet edhe në pjesën tjetër të territorit kombëtar, duke u bërë bashkëpunëtor të privilegjuar i shumë partneriteteve, falë edhe tendencës së fortë për të bërë aleanca multietnike”.

Raporti specifikon se shqiptarët janë në gjendje të menaxhojnë, me theks të veçantë heroinën, gjithë zinxhirin e trafikut; nga kontaktet me prodhuesit në kanalet e shpërndarjes, duke u bërë shpejt furnizuesit kryesorë të grupeve italiane, falë aftësisë për të përsosur substancën bazë në laboratorë në mënyrë specifike./Lapsi.al/